រ៉េនត្រូវគេប្តឹងពីបទមិនសងបំណុល
លោករ៉េន ដែលគេស្គាល់ជាទូទៅតាមរយៈឈ្មោះលី យ៉ុងជេ តារាភាពយន្ត និងជាតារាចំរៀងល្បីឈ្មោះរបស់ប្រទេសកូរ៉េខាងត្បូង ត្រូវបានប្រភពព័ត៌មានមួយឱ្យដឹងថា ពេលនេះកំពុងប្រឈមមុខនឹងបញ្ហាផ្ទាល់ខ្លួនធ្ងន់ធ្ងរមួយ... គឺត្រូវបានគេប្តឹងពីបទមិនសងបំណុលជប្រាក់ចំនួន១៥០.០០០ ដុល្លារអាមេរិក ដែលប្រាក់នេះ លោករ៉េន ត្រូវបានចោទប្រកាន់ថា ខ្ចីគេលេងល្បែង ។ ទាក់ទិនទៅនឹងករណីនេះ កាសែតក្នុងស្រុកមួយរាយការណ៍នៅថ្ងៃទី១៨ តុលា ថា លោករ៉េន ហៅលី យ៉ុងជេ ត្រូវបានគេដាក់ពាក្យបណ្តឹងប្តឹងនៅតុលាការមួយនៅសហរដ្ឋអាមេរិក ពីបទចោទប្រកាន់មិនសងបំណុលខ្ចីគេលេងល្បែងជាប្រាក់ចំនួន១៥០.០០០ ដុល្លារអាមេរិក ។ លោកជំពាក់ប្រាក់បុរសជនជាតិអាមេរិកដើមកំណើតកូរ៉េម្នាក់ឈ្មោះ Andrew Kim។
យោងតាមរបាយការណ៍មួយថា លោកលី យ៉ុងជេ តែងតែចូលលេងល្បែងក្នុងសណ្ឋាគារកាស៊ីណូមួយនៅទីក្រុងឡាស់ វ៉េហ្គាស រដ្ឋណេវ៉ាដា សហរដ្ឋអាមេរិក ហើយបានខ្ចីប្រាក់ចំនួន១៥០.០០០ដុល្លារអាមេរិក ពីបុរសឈ្មោះ Kim ដើម្បីលេងល្បែងតាំងពីខែមិថុនា ឆ្នាំ២០០៧ មកម៉្លេះ ប៉ុន្តែលោកលី យ៉ុងជេ មិនទាន់សងប្រាក់នោះនៅឡើយទេ ។ អ្វីដែលគួរឱ្យភ្ញាក់ផ្អើលទៀតនោះ បុរសឈ្មោះ Kim នោះអះអាងនៅក្នុងឯកសារមួយដែលដាក់ជូនតុលាការថា លោកលី យ៉ុងជេ ជាមនុស្សញៀនល្បែងម្នាក់ ហើយចាក់ល្បែងមួយដៃ១០.០០០ដុល្លារឯណោះ ។
លោករ៉េន ត្រូវបានពលរដ្ឋខ្មែរភាគច្រើនស្គាល់តាមរយៈឈ្មោះលី យ៉ុងជេ នៅក្នុងខ្សែភាពយន្តរឿង «បំណុលផ្ទះជំពាក់ស្នេហ៍» ដែលដើរជាតួឯកជាមួយនាងហាន់ជីអ៊ុន ។ ចាប់តាំងពីសំដែងក្នុងរឿងនោះមក លោកលី យ៉ុងជេ ទទួលបានភាពល្បីល្បាញមិនត្រឹមតែនៅអាស៊ី ប៉ុណ្ណោះទេ តែលោកក៏ទទួលបានភាពល្បីល្បាញនៅអឺរ៉ុបទៀតផង ។ ទោះបីជាបែបណា ទាក់ទិនដល់ករណីជំពាក់បំណុលគេ ដោយសារការលេងល្បែងនេះ ប្រសិនបើជាការពិតនឹងធ្វើឱ្យកេរ្តិ៍ឈ្មោះ និងប្រជាប្រិយភាពរបស់លោកធ្លាក់ចុះយ៉ាងខ្លាំង ៕