សម្តេចតេជោ ៖ការស្រុះស្រួលគ្នា គឺជារឿងល្អប្រសើរ
រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍បញ្ជាក់ថា... «ខ្ញុំអះអាងហ៊ានទទួលខុសត្រូវក្នុងការបង្កើតបរិយាកាសងាយស្រួល ដោយការស្រុះស្រួលគ្នា គឺជារឿងល្អប្រសើរ គឺការផ្តល់សច្ចាប័នទៅលើកំណត់ហេតុនៃការប្រជុំទាំង៣លើក ដែលក្នុងនោះ ទី១-ត្រូវកែសំរួលកងទ័ពនៅក្នុងវត្តកែវសិក្ខាគិរីស្វារៈ ទី២-កែសំរួលកងទ័ព ទី៣-ឱ្យរដ្ឋមន្ត្រីក្រសួងការពារជាតិទាំងពីរធ្វើការងារនេះ។ សម្តេចតេជោនាយករដ្ឋមន្ត្រីហ៊ុន សែន បានមានប្រសាសន៍បញ្ជាក់បែបនេះ នៅវិទ្យាស្ថានជាតិអប់រំ នាព្រឹកថ្ងៃទី១៣ តុលា ឆ្នាំ២០១០ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់សញ្ញាបត្រ ជូនដល់និស្សិតថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៃសាកលវិទ្យាល័យវេស្ទើន សរុបចំនួន១.០៥៩នាក់ ដែលបានបញ្ចប់ការសិក្សាក្នុងឆ្នាំសិក្សា២០០៦-២០០៧ ឆ្នាំសិក្សា២០០៧-២០០៨ ឆ្នាំសិក្សា២០០៨-២០០៩ និងឆ្នាំសិក្សា២០០៩-២០១០ កន្លងមក។
សម្តេចតេជោមានប្រសាសន៍បន្តថា អគ្គបញ្ជាការរងកងទ័ព និងបញ្ជាការកងពលកម្ពុជា ជាមួយយោធភូមិភាគរបស់កងទ័ពថៃក៏បានធ្វើការងាររួចមកហើយដែរ។ បើសិនជាកែសំរួលបញ្ហានេះចប់ហើយ បើកទេសចរណ៍ឡើងវិញ ក៏បាន អត់បញ្ហា បើកដូចកាលមុនថ្ងៃ១៥ កក្កដា ឆ្នាំ២០០៨ ព្រោះវាអស់បញ្ហាហើយ វានៅជាប់តែប៉ុន្មាននាក់ហ្នឹង តែបញ្ហាហ្នឹងចប់ទៅ វាចប់ហើយ ជាទូទៅបរិយាកាសល្អ។ សម្តេចតេជោនាយករដ្ឋមន្ត្រីបញ្ជាក់ថា កំណាត់ព្រំដែនកម្ពុជា-ថៃ មានប្រមាណជាង៨០០គីឡូម៉ែត្រ ហើយជំលោះមិនបានកើតមានតាមបណ្តោយព្រំដែនទាំងជាង៨០០គីឡូម៉ែត្រនេះ ទេ។ វានៅសេសសល់ចំណុចតូចមួយ ដែលមិនទាន់បានដោះស្រាយ ដូច្នេះយើងកុំឱ្យជំលោះនេះវារីករាលដាលក្លាយទៅជាឧបសគ្គនៃសហ ប្រតិបត្តិការរវាងប្រទេសទាំងពីរ។ ដូចជាអណ្តាត និងធ្មេញ អ៊ីចឹងដែរ ដកមួយគ្រវាត់ចោល វាអត់កើត ទុកមួយចោលមួយវាមិនកើត គឺវាត្រូវសំរួលគ្នា។ យើងមិនអាចលើកប្រទេសថៃទៅណាបានទេ ហើយថៃក៏មិនអាចលើកប្រទេសកម្ពុជាទៅណាបានដែរ។ ដូច្នេះត្រូវបង្កើតបរិយាកាសងាយស្រួល ហើយការយោគយល់គ្នានេះ គឺជារឿងមួយល្អ។ សម្តេចមានប្រសាសន៍បន្តថា នៅក្នុងកំណត់ហេតុនោះទៀត មានការវាស់វែងដែលឱ្យអាទិភាពទៅលើការវាស់វែងនៅតំបន់ប្រាសាទ ព្រះវិហារនោះថែមទៀត។
ចំពោះការពាក់ព័ន្ធទៅនឹងពាក្យថា មានក្រុមសកម្មប្រយុទ្ធអាវក្រហមនៅហ្វឹកហាត់ក្នុងប្រទេសកម្ពុជា ហើយត្រូវបានចាប់ខ្លួននោះ សម្តេចតេជោនាយករដ្ឋមន្ត្រីបញ្ជាក់ថា អង្គភាពប្រតិកម្មរហ័ស និងក្រសួងការបរទេសកម្ពុជាក៏បានចេញសេចក្តីប្រកាសបដិសេធរួចស្រេច ទៅហើយ។ ទាក់ទិននឹងបញ្ហានេះ ដោយមានទំនាក់ទំនងផ្ទាល់រវាងសម្តេចតេជោនាយករដ្ឋមន្ត្រីជាមួយ នាយករដ្ឋមន្ត្រីអាប់ភីស៊ីត តាមរយៈយន្តការមួយពិសេស ខាងថៃ SMS មកថា អ្នកដែលនិយាយនោះគឺមិនមែនឆ្លុះបញ្ចាំងគោលជំហររបស់រដ្ឋាភិបាល ទេ។ បើដូច្នេះពេលរាយការណ៍មកឱ្យខ្ញុំ ខ្ញុំបានឱ្យផ្ញើ SMS ត្រឡប់ទៅវិញថា តើអគ្គលេខាធិការក្រុមប្រឹក្សាសន្តិសុខជាតិនិយាយនោះតំណាងឱ្យ រដ្ឋាភិបាលឬអត់? ព្រោះវាដូចជាផ្ទុយគ្នា។ SMS មកដើម្បីជូនព័ត៌មានឱ្យខ្ញុំថា មិនឆ្លុះបញ្ចាំងគោលជំហររដ្ឋាភិបាល។ តើអគ្គលេខាធិការក្រុមប្រឹក្សាសន្តិសុខជាតិអាចតំណាងឱ្យរដ្ឋាភិបាល ទេ ព្រោះខាងថៃបញ្ជូនសារមកថា អ្នកដែលនិយាយនោះមិនឆ្លុះបញ្ចាំងគោលជំហររដ្ឋាភិបាលទេ។ ដូច្នេះឱ្យត្រឡប់ទៅវិញ ព្រោះដូចជាផ្ទុយគ្នា សូមការពន្យល់អំពីបញ្ហាហ្នឹង។
ទាក់ទិននឹងបញ្ហានេះ សម្តេចតេជោនាយករដ្ឋមន្ត្រីហ៊ុន សែន មានប្រសាសន៍រំលឹកថា រឿងនេះដូចជាមានប្រវត្តិវែងឆ្ងាយបន្តិចទៅហើយ។ នៅចុងឆ្នាំ២០០៦ មានផ្ទុះគ្រាប់បែកមួយគ្រាប់ នៅកណ្តាលក្រុងបាងកក ចំថ្ងៃឆ្លងឆ្នាំណូអែល គេថា គ្រាប់បែកទៅពីកម្ពុជា អាហ្នឹងរឿងមួយទៅ។ បន្ទាប់មកទៀតមានរឿងខ្មែរអ៊ិស្លាម កម្ពុជា ធ្វើដំណើរក្នុងមួយថ្ងៃ២០០ទៅ៣០០នាក់ ទៅភាគខាងត្បូងប្រទេសថៃ ដើម្បីទៅចូលរួមប្រយុទ្ធនៅទីនោះ។ ពេលនោះ លោករដ្ឋមន្ត្រីក្រសួងព័ត៌មាន រួមជាមួយលោកអូស្មាន់ ហាស្សាន់ រដ្ឋលេខាធិការក្រសួងការងារដែលតំណាងឱ្យសហគមន៍មូស្លីម ធ្វើការបដិសេធជាច្រើនដងក៏ថៃគេនៅតែមិនស្តាប់។ ទាល់តែនៅ ពេលបើកការដ្ឋានកសាងស្ពានព្រែកក្តាម ខ្ញុំលេងម្តង ខ្ញុំថា មូស្លីមនៅស្រុកខ្មែរមិនល្ងង់ដល់ថ្នាក់ទៅធ្វើជាទាហានស៊ីឈ្នួលច្បាំង ឱ្យភាគខាងត្បូងប្រទេសថៃទេ។ បើសិនជាគេមានចេតនាយ៉ាងដូច្នេះគឺគេវាយពីខាងកម្ពុជាទៅវិញហើយ ព្រោះវាផ្ទប់គ្នាមួយពីជើងមួយពីត្បូង (នេះនិយាយពីយុទ្ធសាស្ត្រយោធា) គេមិនឆ្លងទៅហើយបានវាយពីត្បូងមកនោះទេ។ ពេលនោះខ្ញុំប្រាប់ទៅលោកសូវីយុទ្ធ ហើយលោកសូវីយុទ្ធ បានប្រាប់អ្នកនាំពាក្យខាងយោធាថៃឱ្យធ្វើការប្រយ័ត្នប្រយែង ។
បន្តមកទៀត ព្រឹត្តិការណ៍ថ្ងៃ១០ ខែមេសា ឆ្នាំ២០១០ ដែលពេលនោះមានការបាញ់គ្នានៅកណ្តាលទីក្រុងបាងកក។ កាលណោះ រដ្ឋមន្ត្រីការបរទេសកាស៊ីត ភិរម្យ ឱ្យសុំជួយបិទកាណាល់អាវក្រហម។ សម្តេចមានប្រសាសន៍ថា យើងទៅបិទកន្លែងណា បើមិនដឹងគេផ្សាយពីកន្លែងណាផង។ គេថា កងទ័ពខ្មែរចូលជួយវាយនៅទីក្រុងបាងកក ឥឡូវកំពុងតែរត់មកដល់អ៊ូប៊ុន។ សម្តេចមានប្រសាសន៍ថា ចុះបើដឹងដូច្នេះហើយ ម៉េចក៏មិនចាប់ទៅ...។
សម្តេចតេជោនាយក រដ្ឋមន្ត្រី ហ៊ុន សែន មានប្រសាសន៍ថា ខ្ញុំធ្លាប់បានប្រកាសហាមតាំងពីពេលមានបាតុកម្មនៅថៃម៉្លេះ ទី១-ហាមឃាត់ការចល័តកំលាំងតាមព្រំដែនដែលធ្វើឱ្យខាងភាគីថៃមាន ការភាន់ច្រឡំ ទី២-ហាមឃាត់ពលរដ្ឋខ្មែរដែលធ្វើការនៅប្រទេសថៃចូលរួមបាតុ កម្មជាមួយក្រុមអាវក្រហម ទី៣-សុំឱ្យសហការគ្នាល្អ។ នេះគឺជាការចូលរួមចំណែកដើម្បីបង្កើតនូវបរិយាកាសងាយស្រួលដល់ រាជរដ្ឋាភិបាលថៃហើយ។
ឥឡូវនេះនាយករដ្ឋមន្ត្រីកម្ពុជា និងនាយករដ្ឋមន្ត្រីថៃជួបគ្នាយ៉ាងស្រួល បែរជាអ្នកនាំពាក្យ ទាំងប៉ូលិស ទាំងមតិផ្សេងៗចេញមកអះអាង...ស្អី...ទៅបាញ់មេដឹកនាំ...។ សម្តេចតេជោរិះគន់ថា យី មិនចេះការពារខ្លួនឯងទេអី...? អីក៏វាលំបាកម៉្លេះ។ ស្រុកថៃគេមានច្បាប់កាតព្វកិច្ចយោធា កាលណាគេធ្វើកាតព្វកិច្ចយោធាគេមិនចាំបាច់មកហាត់នៅស្រុក ខ្មែរទេ។ បើជើងដៃដល់វាមិនមែនហាត់ប៉ុណ្ណឹងទេ វាហាត់ដូចពួកអាហ្វាហ្គានីស្ថាន តាលីបង់...រហូតដល់វាចេះបើកយន្តហោះ បើកបុកអគារពាណិជ្ជកម្មពិភពលោកឯណោះ ហាត់៣អាទិត្យស្ទើរភ្លើងយកទៅធ្វើអ្វី? ស្អីអ្នកវិភាគរាយការណ៍ឱ្យលោកអាប់ភីស៊ីត ប៉ុន្តែលោកអាប់ភីស៊ីត មិនមានធ្វើសេចក្តីថ្លែងការណ៍ណាមួយបង្កឱ្យមានអរិភាពនោះទេ គ្រាន់តែគាត់ឆ្លើយថា រកការបញ្ជាក់ ព្រោះវាមិនទាន់ច្បាស់។
សម្តេចតេជោនាយករដ្ឋមន្ត្រីមានប្រសាសន៍ទៀត ថា កម្ពុជាក៏បញ្ជាក់នៅថ្ងៃនេះដែរ ដោយខ្ញុំមិនចាំបាច់និយាយថា កាលពីទសវត្សឆ្នាំ៨០-៩០ នៅប្រទេសថៃមានមូលដ្ឋានខ្មែរក្រហម បន្ទាយខ្មែរក្រហម កំលាំងប្រឆាំង... ហើយខ្ញុំក៏ប្រាប់ទៅអាប់ភីស៊ីតត្រង់ៗ ខ្ញុំដឹងថា មានជនជាតិរបស់ខ្ញុំជាង២០នាក់ នៅបាងកករាល់ថ្ងៃ ខ្ញុំប្រាប់ដូច្នេះ។ អ្នកប្រព្រឹត្តឧក្រិដ្ឋកម្មមួយចំនួននៅទីក្រុងបាងកក ក្នុងនោះមានអ្នកប្រព្រឹត្តបទឧក្រិដ្ឋព្រហ្មទណ្ឌនៃបក្សប្រឆាំង មួយនៅស្រុកមេមត់ ដឹងទាំងអ្នកឱ្យលុយបញ្ជូនទៅទៀត។ មានអ្នកមួយទៅហើយសំភាសន៍មិនជាប់ រួចហើយបាចខិត្តប័ណ្ណជេររាជរដ្ឋាភិបាលដើម្បីទៅសំភាសន៍ម្តង ទៀត ដើម្បីឱ្យជាប់។ ស្តាប់ខ្ញុំនិយាយឱ្យច្បាស់ អ្វីដែលអ្នកបានធ្វើ សូម្បីតែអ្នកដែលបញ្ជូនពីខេត្តកំពង់ឆ្នាំង ចូលទៅដល់ប៉ោយប៉ែត ខ្ញុំដឹងគ្រប់ពេល ចេញពីប៉ោយប៉ែត ឡើងទៅដល់បាងកក ជួបអ្នកណាខ្ញុំដឹងគ្រប់ពេល។ សូមអ្នកកុំភាន់ច្រឡំឱ្យសោះ រឿងផ្នែកនេះមួយអ្នកមិនអាចលេងទាន់ខ្ញុំទេ តែខ្ញុំមិនធ្វើ ។ កម្ពុជាយកការបញ្ជាក់មួយ ខ្លួនមានការទទួលខុសត្រូវ ប្រយុទ្ធប្រឆាំងភេរវកម្ម រឿងផ្ទៃក្នុងរបស់ថៃទុកឱ្យថៃដោះស្រាយខ្លួនឯង។ ធ្វើល្អគេអត់ប្រឆាំងទេ ធ្វើមិនល្អគេប្រឆាំងហើយ...៕