តូក្យូ ជាទីក្រុងថ្លៃជាងគេបំផុតសម្រាប់ការរស់នៅ
តូក្យូ បានក្លាយជាទីក្រុង ដែលមានការចំណាយថ្លៃជាងគេបំផុតក្នុងលោក សម្រាប់បុគ្គលិកបរទេសក្នុងការរស់នៅ។ នេះបើយោងតាមការស្រាវជ្រាវមួយរបស់ក្រុមហ៊ុនប្រឹក្សា Mercer។
ការកើនឡើងនៃតម្លៃប្រាក់យ៉េន ធ្វើឲ្យតម្លៃរស់នៅក្នុងប្រទេសនេះកើនឡើងខ្ពស់។ ទន្ទឹមនឹងនេះ វិបត្តិក្នុងតំបន់អឺរ៉ូ ដែល ធ្វើឲ្យរូបិយប័ណ្ណអឺរ៉ូរង្គោះរង្គើបានធ្វើឲ្យទីក្រុងជាច្រើន ដូចជា ប៉ារីស រ៉ូម អាស្ត៊ែរដាំ ធ្លាក់ចំណាត់ថ្នាក់ទាបជាងមុន។ ការធ្លាក់ចុះនៃប្រាក់ខែ និងកំណើនភាពអត់ការងារធ្វើក្នុងប្លុកប្រទេសអឺរ៉ូបានធ្វើឲ្យ តម្លៃរស់នៅក្នុងប្រទេសនេះធ្លាក់ចុះផងដែរ។ ចំណែកក្រុងឡុងដ៍ របស់ប្រទេសអង់គ្លេសវិញ ក៏បានធ្លាក់ចំណាត់ថ្នាក់មកនៅត្រឹមលេខ ២៥ ដោយថយចុះ ៧ ចំណាត់ថ្នាក់។ ការសិក្សាស្រាវជ្រាវនេះ ធ្វើឡើងក្នុងទីក្រុងធំៗ ចំនួន ២១៤ ជុំវិញ ពិភពលោក។
តាមក្រុមហ៊ុនស្រាវជ្រាវដដែលឲ្យដឹងថា តម្លៃការស្នាក់នៅជាតម្លៃដែលធំជាងគេក្នុងការរស់នៅគឺស្មើនឹង ២៥% នៃការចំណាយសរុប បន្ទាប់មកគឺតម្លៃការធ្វើដំណើរ និងទំនិញ។
បន្ថែមពីនេះ ការកើនឡើងយ៉ាងរហ័សនៃសេដ្ឋកិច្ចអាស៊ី ធ្វើឲ្យតម្លៃរស់នៅនៃប្រទេសដែលមានសេដ្ឋកិច្ចធំៗក្នុងទ្វីបនេះ ហក់ឡើងខ្ពស់គួរឲ្យកត់សម្គាល់ ធ្វើឲ្យការចំណាយរបស់បុគ្គលិកបរទេសជួបនឹងការលំបាកច្រើនជាងមុន៕
ប្រែសម្រួល៖ សីហា
