Coca-Cola នឹងវិនិយោគនៅភូមាសាជាថ្មី!
ក្រុមហ៊ុនភេសជ្ជៈយក្ស Coca-Cola នឹងចាប់ផ្ដើមដំណើរការក្នុងប្រទេសភូមាសាជាថ្មី បន្ទាប់ពីអវត្តមានអស់រយៈពេល ៦០ ឆ្នាំ។ ការសម្រេចត្រឡប់ជាថ្មីក្នុងប្រទេសមួយនេះ គឺដោយសារសហរដ្ឋអាមេរិកបានសម្រេចពន្យារទណ្ឌកម្មសេដ្ឋកិច្ចទៅលើប្រទេសនេះ ដោយមើលឃើញពីកំណែទម្រង់ជាវិជ្ជមានឆ្ពោះទៅរកលទ្ធិប្រជាធិបតេយ្យ។
ក្រុមហ៊ុនភេសជ្ជៈដ៏ល្បីល្បាញមួយនេះ បានឲ្យដឹងថា ខ្លួននឹងចាប់ផ្ដើមជំនួញភ្លាមៗបន្ទាប់ពីទទួលបានអាជ្ញាប័ណ្ណ អនុញ្ញាតពីរដ្ឋាភិបាលអាមេរិក។
ភូមាជាប្រទេសមួយក្នុងចំណោមប្រទេសចំនួនបីដែល Coca-Cola មិនធ្វើជំនួញជាមួយដោយក្នុងនោះមានកូរ៉េខាងជើង និងគុយបាផងដែរ។
ក្នុងរបាយការណ៍របស់ខ្លួន ក្រុមហ៊ុន Coca-Cola បានបញ្ជាក់ថា ខ្លួននឹងចាប់ផ្ដើមជំនួញដោយការនាំចូលផលិតផលនេះ ពីប្រទេសជិតខាងដែលខ្លួនមានរោងចក្រស្រាប់នៅទីនោះ ខណៈពេលការសាងសង់រោងចក្រនៅភូមាកំពុងចាប់ផ្ដើម។ ការប្រកាសរបស់ក្រុមហ៊ុននេះធ្វើឡើង ស្របពេលដែលជម្លោះរវាងអ្នកកាន់សាសនាព្រះពុទ្ធ និងសាសនាឥស្លាម កំពុងបន្ដដែលបណ្ដាលឲ្យមនុស្សរាប់ម៉ឺននាក់ភៀសខ្លួនពីផ្ទះសម្បែង ដើម្បីសន្តិសុខ សុវត្ថិភាព។
របបយោធាផ្ដាច់ការបានគ្រប់គ្រង ប្រទេសភូមាដោយអស់រយៈពេល ៤៩ ឆ្នាំ បានធ្វើឲ្យប្រទេសមួយនេះក្លាយជាប្រទេសឯកា និងហ៊ុមព័ទ្ធដោយទណ្ឌកម្មសេដ្ឋកិច្ច។ ប៉ុន្តែដោយមើលឃើញពីកំណែទម្រង់ក្នុងរយៈពេលចុងក្រោយនេះ ពោលគឺការបើកឲ្យមានការបោះឆ្នោតដោយសេរីនៅឆ្នាំ ២០១១ និងដោះលែងអ្នកទោសនយោបាយ ប្រទេសលោកខាងលិចបានបន្ទន់ឥរិយាបថ និងបន្ធូរបន្ថយទណ្ឌកម្មជាច្រើនមកលើប្រទេសនេះវិញ៕
ប្រែសម្រួល៖ សីហា
