២០១២ WB ថាសេដ្ឋកិច្ចកម្ពុជាកើន៦,៦% អ្នកវិភាគថាខ្ពស់ជាងនេះ
ក្នុងការរបាយការណ៍មួយ របស់ធនាគារពិភពលោក ដែលចេញផ្សាយកាលពីម្សិលមិញ បានបង្ហាញថា សេដ្ឋកិច្ចកម្ពុជា នៅឆ្នាំ២០១២នេះ ត្រូវបានរំពឹងទុកថា នឹងកើនឡើងប្រមាណ ៦,៦% ខណៈដែលអ្នកវិភាគសេដ្ឋកិច្ចឯករាជ្យរំពឹងទុកថា នឹងមានកំណើនខ្ពស់ជាងនេះ។
នៅក្នុងរបាយការណ៍មួយដែល មានឈ្មោះថា បច្ចុប្បន្នភាពនៃប្រតិបត្តិការ និងកំណែទម្រង់សេដ្ឋកិច្ច ប្រចាំខែឧសភា បានបង្ហាញថា កម្ពុជាជាប្រទេសមួយក្នុងចំណោមប្រទេសកំពុងអភិវឌ្ឍន៍ផ្សេងទៀត ដែលកំពុងមានសន្ទុះកំណើនសេដ្ឋកិច្ចខ្ពស់។
របាយការណ៍នោះ ក៏បានបង្ហាញដែរថា ប្រភពដែលជំរុញកំណើនសេដ្ឋកិច្ចខ្លាំងនៅឆ្នាំ ២០១២នេះ គឺដោយសារតែកើនឡើងនៃវិស័យឯកជន ក្នុងនោះ វិស័យកាត់ដេរ និងវិស័យកសិកម្ម ត្រូវបានគេសម្លឹងឃើញថា នឹងមានកំណើនខ្ពស់។
ប្រជាកសិករនៅ ភូមិផ្លាង សង្កាត់ស្នោរ ខណ្ឌពោធិសែនជ័យ កំពុងស្ទួងស្រូវ
នៅឆ្នាំ២០១១កន្លងទៅនេះ ឧស្សាហកម្មកាត់ដេរ និងវាយនភណ្ឌកម្ពុជា នាំ ចេញមានទឹកប្រាក់សរុបប្រមាណ ៤០០០លានដុល្លារ គឺកើនឡើងបានប្រមាណជាង ៣០% បើធៀបនឹងឆ្នាំ២០១០។ ចំណែកវិស័យកសិកម្ម កាលពីឆ្នាំទៅមិញកើនប្រមាណ ៣,៣%។
ដោយឡែក លោក បណ្ឌិត កង ច័ន្ទដារារ័ត្ន អ្នកវិភាគសេដ្ឋកិច្ចឯករាជ្យកម្ពុជា បានអះអាងថា លោកទទួលស្គាល់ថា កម្ពុជានឹងមានកំណើនសេដ្ឋកិច្ចខ្ពស់ តែមិនអាចទាបជាងឆ្នាំទៅមិញបាននោះទេ។ លោកលើកឡើងបែបនេះ ដោយសម្អាងថា ស្ថានភាពក្នុងវិស័យមួយចំនួនរបស់ប្រទេសកម្ពុជា បានងើបឡើងវិញ និងមានលក្ខណៈប្រសើរជាងឆ្នាំមុនច្រើនណាស់ ក្នុងនោះគឺ វិស័យកសិកម្ម និងទេសចរណ៍ នឹងកើនខ្ពស់។
លោកបញ្ជាក់ “ទេសចរណ៍ឆ្នាំនេះ មិនទទួលរងឥទ្ធិពលពីប្រទេសជិតខាង (ទឹកជំនន់នៅថៃ) ទៀតទេ ហើយកសិកម្មវិញ រដ្ឋបានធ្វើអន្តរគមន៍ស្វែងរកទីផ្សារបានច្រើន និងមានឧបត្ថម្ភធនខ្លះផង អីចឹងវិស័យទាំងពីរនឹងមានកំណើនខ្ពស់ ខណៈដែលវិស័យវាយនភណ្ឌ និងកាត់ដេរ យ៉ាងហោចណាស់ នឹងអាចរក្សាបានកំណើនដដែល”។
នៅឆ្នាំ២០១២នេះ តម្លៃប្រេងបានកើនឡើងខ្ពស់ ហើយសហគមន៍អឺរ៉ុបកំពុងជួបបញ្ហាលើវិបត្តិបំណុលដែរ។ ចំពោះបញ្ហាពីរនេះ លោកបណ្ឌិត អះអាងថា នឹងមិនអាចបង្កបញ្ហា អាចបន្ទាបកំណើនសេដ្ឋកិច្ចកម្ពុជាបាននោះទេ ព្រោះឆ្នាំទៅមិញ តំបន់អឺរ៉ុបក៏ជួបបញ្ហាធ្ងន់ធ្ងរ ហើយអាមេរិកក៏ជួបបញ្ហាដែរ តែកម្ពុជានៅតែអាចរក្សាកំណើនបានខ្ពស់ មានន័យថា បញ្ហានេះ មិនមានឥទ្ធិពលធំដុំមកលើសេដ្ឋកិច្ចកម្ពុជានោះទេ។
របាយការណ៍របស់ធនាគារពិភពលោក ក៏បានបង្ហាញផងដែរថា ក្នុងរយៈពេល១០ឆ្នាំចុងក្រោយនេះ កម្ពុជាទទួលបានកំណើនសេដ្ឋកិច្ចគិតជាមធ្យមប្រមាណ ៨%ក្នុងមួយឆ្នាំ។ សម្រាប់ឆ្នាំ២០១១កន្លងទៅនេះ កំណើនសេដ្ឋកិច្ចពិតប្រាកដរបស់ប្រទេសកម្ពុជា គឺកើនឡើងបានប្រមាណ ៦,៩%៕
អត្ថបទ៖ សេង ណារិទ្ធិ