បាត់មុខជិត2ឆ្នាំក្លាយជាអាជីវករលក់សំលៀកបំពាក់
រាជធានីភ្នំពេញ ៖ កញ្ញាណាប់ ពិសី អតីតតារា ចំរៀងនៅតាមភោជនីយដ្ឋាន និងជាតារាសំដែងកាយវិការខារ៉ាអូខេម្នាក់និយមស្លៀកពាក់ទាន់សម័យ បន្ទាប់ពីបាត់មុខជិត២ឆ្នាំ បានក្លាយជាអាជីវករលត់សំលៀកបំពាក់ ។ នាងមានអាយុ២៥ឆ្នាំ តែអះអាងថា... បេះដូងរបស់នាងនៅទំនេរនៅឡើយ ។ កាលពី នាងនៅចាប់អាជីពជាអ្នកចំរៀងសម្លេងរបស់នាងមានទឹកដមពីរោះគួរ សម។ ពេលនោះនាងច្រៀងផង សំដែងកាយវិការខារ៉ាអូខេផង ។ កន្លងមកគេសង្កេតឃើញនាងមានឱកាសបានឡើងច្រៀងជាកិត្តិយសក្នុង កម្មវិធីប្រគំតន្ត្រីចុងសប្តាហ៍តាមស្ថានីយទូរទស្សន៍នានា និងសំដែងភាពយន្តមួយចំនួនផងដែរ ។
កញ្ញាណាប់ ពិសី ឱ្យដឹងថា កន្លងមកនាងធ្លាប់ចូលរួមសំដែងកាយវិការខារ៉ាអូខេឱ្យផលិតកម្ម ទាំងក្នុង និងក្រៅប្រទេសជាច្រើន ជាពិសេសជាញឹកញាប់នាងថតឱ្យផលិតកម្មរស្មីហង្សមាស រហូតមានកេរ្តិ៍ឈ្មោះល្បីគួរសម ។ ទោះបីជាយ៉ាងណាក្តី ចាប់ពីចុងឆ្នាំ២០០៨ មកស្រាប់តែបាត់មុខនាងឈឹង ហើយលេចឮពាក្យចចាមអារ៉ាមថា នាងបានរៀបការជាមួយអាណិកជនខ្មែររស់នៅសហរដ្ឋអាមេរិក ។
នៅ ពេលអ្នកយកព័ត៌មានយើងជួបនាងកាលពីដើមខែកញ្ញា នេះ នៅផ្សារដេប៉ូ ឃើញនាងអង្គុយលក់សំលៀកបំពាក់ទាន់សម័យនៅក្នុងតូបសមល្មមមួយ ដោយហាងនោះដាក់ឈ្មោះថា «ណាប់ ពិសី លក់សំលៀកបំពាក់យុវវ័យទាន់សម័យ» ។ នាងអះអាងថា ការបាត់មុខនាងពីពិភពសិល្បៈមួយរយៈកន្លងមកនេះ គឺមិនមែនដូចដែលគេនិយាយថា នាងរៀបការជាមួយអាណិកជនខ្មែរនៅសហរដ្ឋអាមេរិកទេ គឺដោយសារនាងជាប់ប្រកបរបររកស៊ីលក់ដូរ ។ ក្នុងរបរនេះទី១នាងត្រូវទៅជ្រើសរើសយកសំលៀកបំពាក់ថ្មីៗដែល មានម៉ូដប្លែកៗពីបរទេសយកមកបោះឱ្យម៉ូយនៅតាមផ្សារក្នុង រាជធានីភ្នំពេញ និងជាប់រវល់អង្គុយលក់ជាប្រចាំនៅក្នុងតូបខ្លួនឯង ។
ពិសីនិយាយថា ដោយជាប់រវល់រកស៊ីច្រើនពេក មិនត្រឹមតែឃ្លាតឆ្ងាយពីសិល្បៈទេ គឺសេចក្តីស្នេហាក៏ភ្លេចគិតថា ត្រូវជ្រើសរើសយកបុរសរបៀបណាដែរ។ ដូច្នេះសព្វថ្ងៃនេះបេះដូងនាងនៅទំនេរស្អាតនៅឡើយ តែក៏មិនមែនបានន័យថា គ្មានអ្នកតាមស្រឡាញ់ដែរ គឺមានច្រើនតែនាងបដិសេធ ៕