ក្មេងស្ទាវតណ្ហាក្រាស់ប្លន់រួចនឹកចងរួមរ័កថែមទៀត
ខេត្តរតនគិរី ៖ ជនសង្ស័យ២នាក់ត្រូវប៉ូលិសនៃអធិការដ្ឋានក្រុងបានលុងចាប់ ខ្លួន បន្ទាប់ពីប្លន់ម៉ូតូនាវេលាម៉ោង៤និង៣០នាទីទៀបភ្លឺ នៅចំណុចផ្លូវបំបែក ស្ថិតក្នុងភូមិ៣ សង្កាត់ឡាបានសៀក ក្រុងបានលុង។ មន្ត្រីប៉ូលិសក្រុងបានលុងឱ្យដឹងថា... ជនសង្ស័យម្នាក់ឈ្មោះស៊ី វិបុល ភេទប្រុស អាយុ២៦ឆ្នាំ មានទីលំនៅក្នុងភូមិលើ សង្កាត់ស្រះប្ញស្សី ក្រុងស្ទឹងត្រែង មុខរបរមិនពិតប្រាកដ និងម្នាក់ទៀតឈ្មោះសំ ប៊ុនណារ៉ាក់ ភេទប្រុស អាយុ៣៤ឆ្នាំ មុខរបរមិនពិតប្រាកដ ស្នាក់នៅភូមិជ្រី សង្កាត់យក្សឡោម ក្រុងបានលុង។ ចំណែកជនរងគ្រោះមានគ្នា២នាក់ដែរ ម្នាក់ឈ្មោះឌី នី ភេទស្រី អាយុ៤៤ឆ្នាំ រស់នៅភូមិកែងសាន់ ឃុំសេដា ស្រុកលំផាត់ ជាអ្នកលក់ដូរ និងម្នាក់ទៀតឈ្មោះភួង ម៉ាយ ភេទប្រុស អាយុ៣០ឆ្នាំ ជនជាតិទំពូន រស់នៅភូមិថ្មី ឃុំសេដា។
តាមការបំភ្លឺរបស់ជនរងគ្រោះនៅចំពោះមុខប៉ូលិស ឱ្យដឹងថា នៅថ្ងៃទី១០ តុលា ពួកគេទាំង២នាក់ជិះម៉ូតូឌុបគ្នាពីស្រុកលំផាត់ ទៅទារលុយគេជំពាក់នៅភូមិក្របីជ្រុំ ឃុំត្រពាំងក្រហម ស្រុកកូនមុំ។ ពេលត្រឡប់មកវិញម៉ូតូខូចតាមផ្លូវធ្វើឱ្យពួកគេជ្រុលដំណើររហូត ដល់យប់ជ្រៅ ក៏សំរេចចិត្តទៅសំរាកនៅទីរួមខេត្តរតនគិរី។ ពេលទៅដល់ចំណុចផ្លូវបំបែកស្ថានីយលក់ប្រេងមួយស្រាប់តែជួបជន២ នាក់ស្ទាក់គំរាម រួចនាំពួកគេទាំង២នាក់ចូលក្នុងបន្ទប់ផ្ទះជួលមួយនៅក្បែរនោះ។ ជន២នាក់នោះបង្ខំឱ្យឈ្មោះភួង ម៉ាយ ដោះសំលៀកបំពាក់ដើម្បីឆែកឆេររកលុយ ហើយបានយកកាបូបដៃមួយមានលុយ៧៥.០០០រៀល និងទូរស័ព្ទដៃមួយគ្រឿង។ បន្ទាប់មកជន២នាក់នោះជិះម៉ូតូចេញទៅបាត់។
ក្រុមជនរងគ្រោះប្រាប់ទៀតថា ពួកគេបាននាំគ្នារត់ចេញទៅក្រៅ ទៅប្តឹងប៉ូលិស ប៉ុន្តែពេលទៅដល់រង្វង់មូលផ្សារ ស្រាប់តែឃើញជនទាំង២នាក់នោះត្រឡប់មកវិញ ហើយចាប់បង្ខំឱ្យឈ្មោះឌី នី ឡើងជិះម៉ូតូទៅជាមួយ ដោយបណ្តោយឱ្យឈ្មោះភួង ម៉ាយ ទៅណាក៏ទៅចុះ...។ ជន២នាក់នោះបានដឹកស្ត្រីឈ្មោះឌី នី ចុះឡើងៗរួចត្រឡប់ទៅបន្ទប់ជួលនោះវិញ។ ខណៈនោះជនម្នាក់ជិះម៉ូតូចេញទៅបាត់ ទុកឱ្យជនសង្ស័យឈ្មោះសំ ប៊ុនណារ៉ាក់ នៅបង្ខំឱ្យស្ត្រីរងគ្រោះដោះសំលៀកបំពាក់ចេញបំរុងចាប់រំលោភ ប៉ុន្តែមិនបានព្រមព្រៀងទេ ហើយត្រូវប៉ូលិសទៅដល់ជួយសង្គ្រោះទាន់។
មន្ត្រីប៉ូលិសឱ្យដឹងទៀតថា ជនរងគ្រោះឈ្មោះភួង ម៉ាយ បានទៅប្តឹង ហើយក្រុមប៉ូលិសអធិការដ្ឋានបានបំបែកកម្លាំងជា២ក្រុម ដឹកនាំដោយលោកឯម វុន អធិការក្រុងផ្ទាល់។ ជនរងគ្រោះឈ្មោះភួង ម៉ាយ បាននាំសមត្ថកិច្ចទៅបន្ទប់ជួលលេខ៤ ស្ថិតក្នុងភូមិ៣ សង្កាត់ឡាបានសៀក ក្រុងបានលុង ហើយប្រទះឃើញឈ្មោះសំ ប៊ុនណារ៉ាក់ បំរុងចាប់រំលោភស្ត្រីឈ្មោះឌី នី។ សមត្ថកិច្ចនាំខ្លួនឈ្មោះសំ ប៊ុនណារ៉ាក់ ទៅតាមរកជនសង្ស័យម្នាក់ទៀត ហើយចាប់ខ្លួនបាននៅក្នុងភូមិជ្រី សង្កាត់យក្សឡោម ក្រុងបានលុង រួមទាំងវត្ថុតាងមូ៉តូម៉ាកយ៉ាម៉ាហាពណ៌ខ្មៅ ស៊េរីឆ្នាំ២០០៥ កាបូបលុយ ទូរស័ព្ទដៃ និងលុយចំនួន៧៥.០០០រៀល។ មន្ត្រីប៉ូលិសអធិការដ្ឋានក្រុងបញ្ជាក់ថា ការស្ទាក់ចាប់ឃាត់ខ្លួនជនសង្ស័យប្រើពេលអស់ជិត២ម៉ោង គឺចាប់ខ្លួនបាននៅវេលាម៉ោង៤ទៀបភ្លឺ ថ្ងៃទី១១ តុលា ឆ្នាំ២០១០៕