សហរដ្ឋអាមេរិក និងចិន បើកកិច្ចប្រជុំក្នុងកិច្ចប្រជុំថ្នាក់រដ្ឋមន្ត្រីការពារជាតិរបស់អាស៊ាន
រដ្ឋមន្ត្រីក្រសួងការពារប្រទេសសហរដ្ឋអាមេរិក លោករ៉ូប៊ែត ហ្គេត និងសមភាគីចិន លោក Liang Guanglie បានបើកកិច្ចប្រជុំកម្រមួយ កាលពីថ្ងៃទី១១ តុលា កន្លងមក... ដែលកិច្ចប្រជុំនោះត្រូវបានគេមើលឃើញថាជាជំហានដំបូងមួយឆ្ពោះទៅ រកទំនាក់ទំនងដែលមានជាប្រចាំរវាងយោធាសហរដ្ឋអាមេរិក និងយោធាចិន ។ លោករ៉ូប៊ែត ហ្កេត ថ្លែងនៅក្នុងឱកាសនៃ សន្និសីទកាសែតមួយថា កិច្ចប្រជុំរវាងលោក និងលោក Liang Guanglie នៅក្នុងកិច្ចប្រជុំថ្នាក់រដ្ឋមន្ត្រីការពារជាតិរបស់អាស៊ាន ដែលរៀបចំឡើងនៅក្នុងទីក្រុងហាណូយ ប្រទេសវៀតណាម ត្រូវបានចាត់ទុកថា ជាកិច្ចប្រជុំប្រកបដោយការស្ថាបនា ។ គួររំលឹកថា ចិនបានផ្អាកការចរចាផ្នែកយោធាជាមួយសហរដ្ឋអាមេរិក ក្រោយពីរដ្ឋបាលរបស់លោកប្រធានាធិបតីអូបាម៉ា ប្រកាសពីផែនការលក់សព្វាវុធទៅឱ្យកោះតៃវ៉ាន់ កាលពីដើមឆ្នាំនេះ ។ លោករ៉ូប៊ែត ហ្គេត អះអាងថា កិច្ចប្រជុំរវាងលោក និងលោក Liang Guanglie មិនបានពិភាក្សាអំពីជំលោះថ្មីៗរវាងចិន និងជប៉ុនទេ ៕
