ឆ្នាំនេះក្រុងបាត់ដំបងទទួលរង្គ្រោះដោយសារទឺកជំនន់យ៉ាងដំណំ
ខេត្តបាត់ដំបង ៖ យោងតាមសេចក្តីប្រកាសរបស់ក្រសួងធនធានទឹក និងឧតុនិយម ពិតមែនតែខេត្តបាត់ដំបងមិនមែនជាគោលដៅដែលទទួលរងនូវសម្ពាធ ទាបនៃអាកាសធាតុដែលបង្កឱ្យមានភ្លៀងធ្លាក់ខ្លាំងកាលពីសប្តាហ៍ មុនក្តី ប៉ុន្តែក្នុងរយៈពេលនេះ... ខេត្តបាត់ដំបងអាចនឹងទទួលរងនូវសម្ពាធទាបនេះ នេះបើតាមការអះអាងពីមន្ត្រីជំនាញ។ ជាក់ស្តែងនៅវេលាពាក់កណ្តាលអធ្រាត្រនាយប់ថ្ងៃទី១៤ តុលា ភ្លៀងបានបង្អោរធ្លាក់មួយមេធំយ៉ាងខ្លាំងក្នុងរយៈពេលប្រហែល៣ ម៉ោង និងបន្តរលឹមទល់ភ្លឺបានបណ្តាលឱ្យជន់លិចស្ទើរគ្រប់កន្លែងទាំង អស់ក្នុងក្រុងបាត់ដំបង។ ប៉ុន្តែដោយសារតែក្នុងក្រុងសំបូរទៅដោយប្រព័ន្ធលូ ហើយម្យ៉ាងទៀតដោយសារតែទឹកស្ទឹងសង្កែ មានកំរិតទាប ទើបជំនន់ទឹកភ្លៀងនេះត្រូវបានរំដោះទាន់ពេលវេលាបានមួយចំនួន ធំ។ ទោះបីជាយ៉ាងណា នៅព្រឹកថ្ងៃទី១៥ តុលា គេសង្កេតឃើញនៅតាមបណ្តាសាលារៀន អគាររដ្ឋបាល និងកំណាត់ផ្លូវខ្លះនៅលិចលង់នៅឡើយ ហើយអាជ្ញាធរ និងមន្ទីរជំនាញកំពុងប្រឹងប្រែងយ៉ាងខ្លាំង ដើម្បីរំដោះទឹកជំនន់ដ៏គំហុកនេះ។
លោកអ៊ុយ រី អភិបាលក្រុងបាត់ដំបង បានប្រាប់កោះសន្តិភាពនាព្រឹកថ្ងៃ ទី១៥ តុលា ថា ភ្លៀងចាប់ផ្តើមធ្លាក់ខ្លាំងតាំងពីម៉ោង១១យប់ ថ្ងៃទី១៤ តុលា រហូតដល់ភ្លឺ ហើយបានធ្វើឱ្យជន់លិចស្ទើរគ្រប់ទីកន្លែងក្នុងចំណោមសង្កាត់ទាំង ១០របស់ក្រុងបាត់ដំបង។ លោកអភិបាលស្រុកបានបន្តថា ជំនន់ទឹកភ្លៀងនេះបានស្រកទៅវិញលឿនដែរ ប៉ុន្តែតាមសាលារៀន សាលាសង្កាត់ និងលំនៅឋានប្រជាពលរដ្ឋមួយចំនួន និងផ្លូវគមនាគមន៍នៅកន្លែងខ្លះនៅបន្តលិចនៅឡើយ។ លោកបានបញ្ជាក់ថា អាជ្ញាធរក្រុង និងមន្ត្រីនៃមន្ទីរសាធារណការខេត្តកំពុងចុះពិនិត្យប្រព័ន្ធលូ បង្ហូរទឹកសំខាន់ៗ ហើយយើងកំពុងប្រើប្រាស់គ្រឿងចក្រ ដើម្បីកាយមុខលូណាដែលកកស្ទះចៀសវាងក្រែងមានភ្លៀងធ្លាក់បន្ត ទៀត នាំឱ្យមានការកកស្ទះកាន់តែខ្លាំង។ ទោះបីជាបែបណាលោកអភិបាលបានថ្លែងថា ជំនន់ទឹកភ្លៀងនេះមិនបង្កមហន្តរាយដល់ទ្រព្យសម្បត្តិប្រជាពល រដ្ឋ ឬគ្រោះថ្នាក់ដល់មនុស្ស ឬដំណាំកសិកម្មទេ។
លោកស៊ុន ហេង អភិបាលរងខេត្តបាត់ដំបង បានថ្លែងដែរថា មិនទាន់មានសេចក្តីរាយការណ៍ពីតាមបណ្តាស្រុកនានាអំពីផលប៉ះ ពាល់ដោយជំនន់ទឹកភ្លៀងនាយប់ថ្ងៃទី១៤ តុលា នេះទេ លើកលែងតែក្រុងបាត់ដំបងប៉ុណ្ណោះ ដែលបានទទួលរងនូវគ្រោះជំនន់ទឹកភ្លៀងនាយប់នោះ។ លោកអភិបាលរងខេត្តរូបនេះបានបញ្ជាក់ថា មិនមានផលប៉ះពាល់ធ្ងន់ធ្ងរទេចំពោះជំនន់ទឹកភ្លៀងនេះ ព្រោះទឹកបានហូរចូលស្ទឹងសង្កែបានលឿន ដោយសារតែកំរិតទឹកស្ទឹងនៅទាប។
លោកខាន់ ម៉ាណេរ ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានមានប្រសាសន៍ប្រាប់កោះសន្តិភាពកាលពីព្រឹកថ្ងៃទី១៥ តុលា ថា ជំនន់ទឹកភ្លៀងនាយប់ថ្ងៃ ទី១៤ តុលា នេះ ពិតមែនតែធំដុំគ្រាន់បើ ប៉ុន្តែមិនបានធ្វើឱ្យខូចខាតផ្លូវថ្នល់ទេ ព្រោះទឹកជំនន់នេះត្រូវបានរំដោះទាន់ពេលវេលា ដោយសារតែក្រុងបាត់ដំបងសំបូរទៅដោយប្រព័ន្ធលូបង្ហូរទឹកខ្វាត់ ខ្វែង។ លោកប្រធានមន្ទីររូបនេះបានបញ្ជាក់ថា កំលាំងជំនាញរបស់លោកកំពុងប្រឹងប្រែងយ៉ាងខ្លាំងនៅព្រឹកថ្ងៃទី១៥ តុលា ដោយប្រើគ្រឿងចក្រកាយមុខលូណាដែលកកស្ទះ ដើម្បីរំដោះទឹកដែលនៅសល់ ម្យ៉ាងទៀតក្រែងមានភ្លៀងធ្លាក់បន្តទៀតនាំឱ្យមានការកកស្ទះ ខ្លាំង ដូច្នេះយើងត្រូវតែត្រួតពិនិត្យប្រព័ន្ធលូសំខាន់ឱ្យបានមុន។
ជាមួយនឹងអាកាសធាតុដែលកំពុងមានសម្ពាធទាប គ្របដណ្តប់លើខេត្តបាត់ដំបងនាពេលនេះ លោកឡុង ផល្គុន ប្រធានមន្ទីរធនធានទឹក និងឧតុនិយមខេត្តបានប្រាប់កោះសន្តិភាពថា កាលពីប៉ុន្មានថ្ងៃមុន ខេត្តបាត់ដំបងមិនស្ថិតក្នុងគោលដៅដែលគ្របដណ្តប់ដោយសម្ពាធទាប នៃអាកាសធាតុនេះទេ ប៉ុន្តែចាប់ពីថ្ងៃទី១៥ តុលា នេះទៅ ខេត្តបាត់ដំបងអាចនឹងទទួលរងនូវសម្ពាធនេះដូចខេត្តដទៃដែរ រហូតដល់ថ្ងៃទី១៨ តុលា ទើបធូរស្រាលវិញ។ លោកប្រធានមន្ទីររូបនេះ បានបញ្ជាក់ថា ការប្រមូលផ្តុំនូវប្រព័ន្ធសម្ពាធតូចៗធ្វើឱ្យធំបាន ហើយចំលើខេត្តបាត់ដំបងយើងតែម្តង ទើបបង្កឱ្យមានភ្លៀងធ្លាក់ខ្លាំងនារយៈពេលនេះ។ ដូច្នេះលោកសូមអំពាវនាវដល់ប្រជាពលរដ្ឋក្នុងខេត្តបាត់ដំបង ឱ្យមានការប្រុងប្រយ័ត្នជានិច្ច ជាពិសេសប្រជាពលរដ្ឋដែលរស់នៅតាមដងស្ទឹងសង្កែ និងតំបន់ក្បែរទន្លេសាប គួរតែត្រៀមលក្ខណៈដើម្បីការពារនូវជំនន់ទឹកភ្លៀងដ៏អាក្រក់នេះ ដែលអាចមានចាប់ពីថ្ងៃទី១៥ ដល់ថ្ងៃទី១៨ តុលា។ ប៉ុន្តែជំនន់ទឹកភ្លៀងនេះមិនធ្ងន់ធ្ងរណាស់ណាទេ៕