តណ្ហាឡើងហួសកំរិតនារីវិកលចរិតក៍មិនលើកលែង
ខេត្តកណ្តាល ៖ បុរសសង្ស័យម្នាក់បានចាប់ស្ត្រីមិនពេញលក្ខណៈរំលោភរហូតបានសំរេច រួចបានបៀតបៀនកេរ្តិ៍ខ្មាសនារីរងគ្រោះម្តងហើយម្តងទៀត រហូតដល់នាងទ្រាំលែងបានក៏រត់ទៅប្រាប់ម្តាយ។ ភ្លាមនោះម្តាយនារីរងគ្រោះបានប្តឹងប៉ូលិសឱ្យឃាត់ខ្លួនជនកំហូច... កាលពីវេលាម៉ោង២រសៀលថ្ងៃទី១៦ សីហា ឆ្នាំ២០១០ កន្លងមក។ ហេតុការណ៍នេះបានកើតឡើងកាលពីវេលាម៉ោង៣រសៀល ថ្ងៃទី១៥ តុលា ក្នុងឃុំវិហារសួគ៌ ស្រុកខ្សាច់កណ្តាល។
ជនសង្ស័យដែលសមត្ថកិច្ចឃាត់ខ្លួនឈ្មោះកង ធា អាយុ៤២ឆ្នាំ ជាកសិករ មានទីលំនៅឃុំវិហារសួគ៌ ស្រុកខ្សាច់កណ្តាល។ ចំណែកស្ត្រីរងគ្រោះអាយុ២៣ឆ្នាំ ជាស្ត្រីមិនគ្រប់លក្ខណៈ រស់នៅភូមិ-ឃុំកើតហេតុខាងលើ។ តាមប្រភពព័ត៌មានពីមន្ត្រីប៉ូលិសស្រុកខ្សាច់កណ្តាលបានឱ្យដឹងថា នៅវេលាម៉ោង១២ថ្ងៃត្រង់ ឆ្នាំ២០១០ មិនចាំថ្ងៃខែ នារីរងគ្រោះបានដើរចេញពីផ្ទះទៅបោចចំបើងនៅក្នុងចំការក្បែរស្រះ ស្រាប់តែជនសង្ស័យឈ្មោះកង ធា បានមកឱបនាងពីក្រោយជាប់ រួចបានកាច់ផ្តួលទៅលើដី ហើយក៏ធ្វើសកម្មភាពរំលោភរហូតបានសំរេច។ លុះបីថ្ងៃក្រោយមកទៀត នៅវេលាម៉ោង២រសៀល នារីរងគ្រោះបានយកក្របីទៅឃ្វាលពេលនោះជនសង្ស័យបានទៅឱបនាងបំរុង រំលោភទៀត តែត្រូវនាងរើរួច។
មន្ត្រីប៉ូលិសបានបន្តថា លុះមកដល់ថ្ងៃទី១៥ តុលា វេលាម៉ោង១២ថ្ងៃត្រង់ ស្ត្រីរងគ្រោះបានទៅឃ្វាលក្របីនៅចំណុចត្រពាំងមួយ ចំណែកឈ្មោះកង ធា ក៏បានទៅឃ្វាលក្របីនៅទីនោះដែរ។ រហូតដល់ម៉ោង៣រសៀល នារីរងគ្រោះ និងឈ្មោះកង ធា បាននាំគ្នាចូលទៅជ្រកភ្លៀងក្នុងរោងចាំឈូក។ ពេលនោះដោយមានឱកាសល្អឈ្មោះកង ធា ក៏បានចាប់រំលោភនារីរងគ្រោះម្តងទៀត។ ក្រោយមក នារីរងគ្រោះបានជិះលើខ្នងក្របីត្រឡប់មកផ្ទះវិញ ហើយយករឿងនោះទៅប្រាប់ម្តាយ ភ្លាមៗនោះម្តាយនារីរងគ្រោះបានដាក់ពាក្យបណ្តឹងដល់សមត្ថកិច្ច ប៉ូលិស រួចក៏ធ្វើការឃាត់ខ្លួនជនសង្ស័យតែម្តង។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពដូចខាងលើប្រាកដមែន។ បច្ចុប្បន្នជនសង្ស័យឈ្មោះកង ធា ត្រូវបានសមត្ថកិច្ចប៉ូលិសកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់៕