ប្រទេសឡាវសំរុកទិញផ្លែប្រមាត់មនុស្សពីខេត្តស្ទឹងត្រែង
ខេត្តស្ទឹងត្រែង ៖ ក្នុងរដូវវស្សារុក្ខជាតិម្យ៉ាងដែលបានដុះនៅក្នុងតំបន់ព្រៃ ភ្នំ និងមានដើមទំហំប៉ុនមេដៃត្រូវបញ្ចប់ការលូតលាស់នៅរដូវប្រាំង ផ្លែរាងមូលតូចប៉ុនផ្លែម្រេចដែលពេលនៅខ្ចីមានពណ៌បៃតង និងពេលទុំមានពណ៌ខ្មៅស្រដៀងនឹងផ្លែម្រេច... តែមានរសជាតិល្វីងហើយភាគច្រើនគេហៅថា «ផ្លែប្រមាត់មនុស្ស»។ លោកថៃ ឡុង ជាឈ្មួញកណ្តាលមានទីលំនៅក្នុងភូមិព្រែក សង្កាត់ស្ទឹងត្រែង ក្រុងស្ទឹងត្រែង បានប្រាប់កោះសន្តិភាពឱ្យដឹងថា ជាយូរមកហើយពុំសូវមានអ្នកចាប់អារម្មណ៍ចំពោះគ្រាប់ផ្លែប្រមាត់ មនុស្សនេះប៉ុន្មានទេ ហើយការដែលយើងទិញចូលក៏ក្នុងតំលៃទាបដែរ ទើបតែចូលដល់ឆ្នាំ២០១០នេះ ប្រទេសឡាវបានសំរុកប្រមូលទិញ ហើយមានតំលៃរហូតដល់ទៅ៧.០០០ទៅ៨.០០០រៀលក្នុងមួយគីឡូក្រាម ដែលប្រៀបធៀបទៅនឹងឆ្នាំមុនៗក្នុងមួយគីឡូក្រាមតំលៃ១.០០០រៀល ប៉ុណ្ណោះ និងគ្មានអ្នកណាចាប់អារម្មណ៍ចង់ទិញផង។
លោកបានបន្តទៀតថា ចំពោះលោកជាឈ្មួញកណ្តាលបានទិញចូលក្នុងតំលៃមួយគីឡូក្រាមពី២.០០០ ទៅ៣.០០០រៀល ហើយលោកលក់បន្តឱ្យឈ្មួញដែលទិញយកទៅប្រទេសឡាវបាន៣.២០០រៀល ក្នុងមួយគីឡូក្រាម។ ឯឈ្មួញដែលយកទៅលក់ដល់ប្រទេសឡាវនោះបានតំលៃដល់ទៅ៧.០០០ ទៅ៨.០០០រៀលក្នុងមួយគីឡូក្រាម ហើយក្នុងមួយថ្ងៃលោកទិញចូលបានពី១០០ទៅ ២០០គីឡូក្រាមដោយមានបងប្អូនអ្នកភូមិយកមកលក់ដល់ទីកន្លែង ។ លោកថៃ ឡុង បានរៀបរាប់បន្តទៀតថា ចំពោះផ្លែប្រមាត់មនុស្សដែលប្រទេសឡាវប្រមូលទិញនេះមិនដឹងថា គេយកទៅផលិតចេញជាអ្វីនោះទេ ប៉ុន្តែអ្នកស្រុកយើងភាគច្រើនគេយកផ្លែប្រមាត់មនុស្សនេះទៅហាល ថ្ងៃឱ្យក្រៀមរួចដាំជាមួយទឹកសំរាប់ទទួលទាន បង្ការជំងឺគ្រុនចាញ់ធ្វើឱ្យត្រជាក់ខ្លួន និងមានសុខភាពល្អ ព្រោះវាមានរសជាតិល្វីងទាំងផ្លែទាំងដើម។
លោកបានបន្ថែមទៀតថា គ្រាប់ផ្លែប្រមាត់មនុស្សនេះប្រជាពលរដ្ឋយើងដែលរស់នៅតាមតំបន់ ព្រៃភ្នំដាច់ស្រយាលដើរបេះសន្សំម្តងបន្តិចៗ ព្រោះភាគច្រើនវាដុះនៅក្នុងព្រៃ។ ដើមរបស់វាមិនធំដូចជាដើមស្វាយ ឬដើមល្ហុងឡើយ ហើយក៏មិនមានលក្ខណៈដូចជាវល្លិដែរ ពោលគឺដូចជាដើមទន្ទ្រានខេត្ត។ វាចាប់ផ្តើមដុះនៅពេលមានភ្លៀងធ្លាក់លុះដល់ពេលរដូវក្តៅវិញ វាក៏ងាប់ទៅវិញ ហើយវាគឺជារុក្ខជាតិដុះឡើងដោយឯងៗពីធម្មជាតិ និងត្រូវបានគេដាក់ឈ្មោះថា «ដើមប្រមាត់មនុស្ស ឬផ្លែប្រមាត់មនុស្ស» ៕